2/3/10

NON COMPRENI ARREN

Ena Val d'Aran qu'èm harts dejà de tant de caciquisme politic, de tant amplir-se era boca damb promeses e ideals que non existissen, de tant d'anticatalanisme arrevirat en espanholisme, de tanta ignorància, de tant de desconeishement. Es politics actuaus dera Val d'Aran non servissen entad arren, uns diden de trincar eth pacte UA-PSOE, que non ac haràn jamès pr'amor que viuen d'açò, d'auti pactant damb eth PP e criticant tostemp sense dar solucions, d'auti criticant a tòrt e a dret sense cap motiu sonque tà benefici pròpi. Se quauquarrés cree bèth projècte interessant, ja i son es contraris entà crear ua causa similara a veir qui guanhe. Atau jamès s'artenherà arren.

Non i a ne un politic aranés que parle d'Occitània, non i a ne un politic aranés que parle der occitan. Cau voler hèr projèctes conjunts damb era rèsta d'Occitània, eth prumèr pas serie daurir comunicacions entre era Val d'Aran e Occitània entara gent. Perqué era gent que vò agarrar un avion a d'anar tà Barcelona? se en Tarba o en Tolosa i a un aeropòrt (e sense auer de passar ua frontèra artificiau com ei tunel). Perqué non i a autocars que mos pòrten tà Sant Gaudenç o tà Luishon e òc que n'i a tà Lhèida e Barcelona? Perqué en estudi mos ensenhen abans eth catalan e eth castelhan (que ei important tanben) que toti es parlar occitans? Perqué sabem qu'eth Cid ère un gran lutador e mos pensam que Joan Petit ei solet eth protagoniste d'ua cançon de mainatges? Perqué pòth vier a trebalhar ena Val d'Aran un professor de Barcelona o Lhèida o Aragón abans qu'un de Tolosa o Limòges? Perqué entà anar entara universitat mos cau anar tà Lhèida, Barcelona, Saragossa o Madrid, e non podem anar tà Tolosa (que serie çò de mès naturau)? Perqué enes restaurants aranesi podem trobar vins d'Espanha e non trobam cap vin deth país? En fin, i a infinites preguntes, mès m'arturi ací perqué ja ne sò hart de trobar tantes preguntes sense responsa logica, pr'amor que responsa òc que n'an, interèsi politcs!
Cau pensar qu'era Val d'Aran, soleta per era madeisha non a pro mejans entà tirar endauant, que passe que eth torisme dera nhèu e d'era especulacion urbanistica durarà entà tostemp? NON! Era Val d'Aran, encara que sigue complicat, a de tornar ara ramaderia, a viuer des tèrres e des bòsqui. Non se pòt viuer permanentment deth torisme ranci, bèth dia s'acabarà era nhèu, Baqueira barrarà e era Val d'Aran entrarà en decadència. Cau èster preparats entà d'açò e cau cercar solucions e alternatiues reals, serioses, que agen futur.

4 comentaris:

Asier G. ha dit...

Aqueste qu'èi un bon messatge, jo que pensi la medisha causa... pr'amor que tant dins un costat coma deu aute, la termièra que demora ben hòrta, confinhant las nostas vidas.

Farri ha dit...

Ei ua pietat!

A 18 Kms. de Les (darrèra estacion d'autobusi) i a ua estacion de tren.

Er aerport de Tarba, e er aeropòrt internacionau de Tolosa son mès pròplèu qu'es de Lhèida e Barcelona.

Es aranesi comprenen milhor eth catalan qu'eth gascon dera plana e eth lenguadocian. Ei a díder: non coneishen era sua lengua!

Es aranesi coneishen era istòria d'Espanha e non saben arren sus era istòria d'Occitània, qu'explique fòrça causes tanben dera Val.

Eth torisme ranci d'Aran a convertit era Val en un parc tematic, e er usatge sociau dera lengua a davalat fòrça.

Fin finau veigui un missatge aranés damb consciéncia. Gràcies amics de Lo País per daurir-mos un shinhalet era esperança.

Bestio del Giboudan ha dit...

Torne beire que lous Aranés se demondou coumo parlan del coustat francés de la frountiero.

Per legi de coumengés de Fronço: (parla de Sant-Gaudens):

Û counte coumengés: era mandro descoetado

http://mistralenc.over-blog.com/article-un-counte-coumenges-era-mandro-descoetado-68628745.html

Se bouguet descubri lous antres parlas d'oc, escriben subretout en aubernhat, cebenò e giboudanés (escribe en giboudanes), ame un pessuc de proubença.

http://mistralenc.over-blog.com/

Lous T, C, S finas sou touchours muts en aubernhat e soubent muts en giboudanés.

En proubença s'escribou pas.

Adounc çou que s'escrieu "Èi pourtat lou sac de moun amic"
se prounouncio

/èy purta lu sa de mun amyi/


Amistats a toùti es Aranédi que parlon era sio lengo (parla de Banheres de Lushoun)

Guiral Mars ha dit...

Un proufessour de Toulouso vous entendrio pas, e bessai un de Sent-Gaudens tampauc.

Almen lou de Sant-Gaudens lou poudrés entendre e pensi també lou de Toulouso.

Mas lou de Lemotge vous entendrò jis e vàutri l'entendrés pas tampauc.


Avet un parla forço periferique e lou de Lemotge l'es també d'uno auto modo.